فَاِنۡ لَّمۡ یَسۡتَجِیۡبُوۡا لَکَ فَاعۡلَمۡ اَنَّمَا یَتَّبِعُوۡنَ اَہۡوَآءَہُمۡ ؕ وَ مَنۡ اَضَلُّ مِمَّنِ اتَّبَعَ ہَوٰىہُ بِغَیۡرِ ہُدًی مِّنَ اللّٰہِ ؕ اِنَّ اللّٰہَ لَا یَہۡدِی الۡقَوۡمَ الظّٰلِمِیۡنَ﴿٪۵۰﴾

۵۰۔ پس اگر وہ آپ کی یہ بات نہیں مانتے تو آپ سمجھ لیں کہ یہ لوگ بس اپنی خواہشات کی پیروی کرتے ہیں اور اللہ کی طرف سے کسی ہدایت کے بغیر اپنی خواہشات کی پیروی کرنے والے سے بڑھ کر گمراہ کون ہو گا؟ اللہ ظالموں کو یقینا ہدایت نہیں کرتا۔

تفسیر آیات

۱۔ فَاِنۡ لَّمۡ یَسۡتَجِیۡبُوۡا لَکَ: اگر وہ آپ کی یہ بات نہیں مانتے تو معلوم ہو جاتا ہے ان دونوں کتابوں سے زیادہ ہدایت بخشنے والی کتاب موجود نہیں ہے، نہ ہی کوئی کتاب پیش کر سکتا ہے اور یہ بات بھی واضح ہو جاتی ہے کہ ان کا نہ ماننا اس لیے نہیں کہ آپؐ کی دعوت یا آپؐ کی طرف سے دلیل میں کوئی کمزوری ہے۔ ان کے نہ ماننے کی اصل وجہ یہ ہے کہ وہ تلاش حق میں مخلص نہیں ہیں۔ اس میں ان کی خواہش پرستی رکاوٹ ہے۔ یہ خواہش پرستی ہے جس کی وجہ سے کوئی دلیل مؤثر ہوتی ہے اور نہ معجزہ کارگر ہوتا ہے۔

۲۔ وَ مَنۡ اَضَلُّ مِمَّنِ اتَّبَعَ ہَوٰىہُ: خواہش پرستی گمراہی کا آخری زینہ ہے۔ جب خواہش پرستی بِغَيْرِ ہُدًى مِّنَ اللہِ اللہ کی طرف سے ہدایت کے بغیر ہو تو اس خواہش پرستی سے زیادہ گمراہی ہو نہیں سکتی۔