وَ اتَّخَذُوۡا مِنۡ دُوۡنِ اللّٰہِ اٰلِہَۃً لِّیَکُوۡنُوۡا لَہُمۡ عِزًّا ﴿ۙ۸۱﴾

۸۱۔ اور انہوں نے اللہ کے سوا دوسرے معبود بنا لیے ہیں تاکہ ان کے لیے باعث تقویت بنیں ۔

کَلَّا ؕ سَیَکۡفُرُوۡنَ بِعِبَادَتِہِمۡ وَ یَکُوۡنُوۡنَ عَلَیۡہِمۡ ضِدًّا﴿٪۸۲﴾

۸۲۔ ہرگز نہیں، (کل) یہ سب ان کی عبادت ہی سے انکار کریں گے اور ان کے سخت مخالف ہوں گے۔

تشریح کلمات

عِزًّا:

( ع ز ز ) العز اس حالت کو کہتے ہیں جو انسان کو مغلوب ہونے سے محفوظ رکھے۔

تفسیر آیات

لِّیَکُوۡنُوۡا لَہُمۡ عِزًّا: مشرکین ان معبودوں سے اپنی دنیاوی زندگی کے لیے تقویت چاہتے تھے۔ مشرکین آخرت پر ایمان نہیں رکھتے تھے لہٰذا وہ ان معبودوں کو اپنے دنیاوی مفادات کے حصول کا ذریعہ سمجھتے تھے۔

جواب میں فرمایا: جس یوم آخرت کے تم منکر ہو وہ دن ضرور آئے گا اور اس دن تمہارے یہ معبود نہ صرف تمہاری کوئی مدد نہیں کر سکیں گے بلکہ تمہارے خلاف ہوں گے۔

اہم نکات

۱۔ غیر اللہ کی پوجا کرنے والے غیر اللہ کے حوالے ہوں گے جو ان کے خلاف ہوں گے۔