وَ مَنۡ یُّطِعِ اللّٰہَ وَ الرَّسُوۡلَ فَاُولٰٓئِکَ مَعَ الَّذِیۡنَ اَنۡعَمَ اللّٰہُ عَلَیۡہِمۡ مِّنَ النَّبِیّٖنَ وَ الصِّدِّیۡقِیۡنَ وَ الشُّہَدَآءِ وَ الصّٰلِحِیۡنَ ۚ وَ حَسُنَ اُولٰٓئِکَ رَفِیۡقًا ﴿ؕ۶۹﴾

۶۹۔اور جو اللہ اور رسول کی اطاعت کرے وہ انبیاء، صدیقین، گواہوں اور صالحین کے ساتھ ہو گا جن پر اللہ نے انعام کیا ہے اور یہ لوگ کیا ہی اچھے رفیق ہیں۔

ذٰلِکَ الۡفَضۡلُ مِنَ اللّٰہِ ؕ وَ کَفٰی بِاللّٰہِ عَلِیۡمًا﴿٪۷۰﴾

۷۰۔ یہ فضل اللہ کی طرف سے (ملتا) ہے اور علم و آگاہی کے لیے تو اللہ ہی کافی ہے۔

تفسیر آیات

۱۔ وَ مَنۡ یُّطِعِ اللّٰہَ: اطاعت گزاروں کے بارے میں یہ نہیں فرمایا کہ یہ خود گواہ، صدیق اور صالح ہوں گے، بلکہ فرمایا اطاعت گزار ان لوگوں کے ساتھ ہوں گے۔ یعنی درجات میں فرق کے باوجود صحبت حاصل رہے گی۔

۲۔ اَنۡعَمَ اللّٰہُ عَلَیۡہِمۡ: جنہیں اللہ تعالیٰ نے اپنی نعمتوں سے نوازا ہے، وہی لوگ ہیں جو صراط مستقیم پر ہیں۔ آگے ان کا تفصیلی ذکر ہوتا ہے:

الف۔ النَّبِیّٖنَ: انبیائے کرام علیہم السلام ان ذوات مقدسہ کو کہتے ہیں جن پر اللہ تعالیٰ کی طرف سے وحی ہوتی ہے۔

ب۔ الصِّدِّیۡقِیۡنَ: جن کا قول و فعل دونوں سچائی پر مبنی ہوں۔ یعنی ان کا کوئی عمل اور کوئی قول ان کے ایمان کے خلاف نہ ہو۔ وہ اپنے ہر قول اور ہر عمل میں سچے ہوں۔ کیونکہ کوئی اگر اپنے ایمان و عقیدے کے خلاف عمل کرتا ہے تو اس کا یہ عمل اس کے ایمان کی تصدیق نہیں کرتا، چونکہ یہ ایمان کے منافی ہے، جسے عصیان اور گناہ کہتے ہیں۔ صدیقین وہ ہیں جن کا قول و فعل ان کے ایمان کی تصدیق کرے۔

ج۔ الشُّہَدَآءِ: جن کا قول اور فعل ان کے ایمان کی گواہی دے۔ راہ حق میں شہید ہونے والے شاید اسی وجہ سے شہید کہلاتے ہیں کہ ان کا راہ خدا میں جان دینا ان کے پختہ ایمان پر گواہ ہے نیز گواہ سے مراد وہ لوگ بھی ہو سکتے ہیں جو اعمال عباد پر گوا ہ ہیں، جس کا سورۂ بقرہ آیت ۱۴۳ میں ذکر ہوا ہے۔ علامہ طباطبائی کا مؤقف یہ ہے کہ شہداء سے مراد گواہ ہیں۔ یعنی جو ہستیاں اعمال عباد پر گواہ ہیں، ان کو قرآن شہید کہتا ہے۔ راہ خدا میں مارے جانے والوں کے لیے شہید کہنے کی اصطلاح قرآنی نہیں ہے، بعد کی اصطلاح ہے۔

د۔ الصّٰلِحِیۡنَ: نیکی پر عمل جاری رکھنے والے صالحین ہیں۔ چنانچہ قرآن میں عمل کے ساتھ ہمیشہ صالح کا لفظ آیا ہے۔ ارشاد ہوتا ہے :

یُؤۡمِنُوۡنَ بِاللّٰہِ وَ الۡیَوۡمِ الۡاٰخِرِ وَ یَاۡمُرُوۡنَ بِالۡمَعۡرُوۡفِ وَ یَنۡہَوۡنَ عَنِ الۡمُنۡکَرِ وَ یُسَارِعُوۡنَ فِی الۡخَیۡرٰتِ ؕ وَ اُولٰٓئِکَ مِنَ الصّٰلِحِیۡنَ﴿﴾ (۳ آل عمران ۱۱۴)