فَاِنۡ تَوَلَّیۡتُمۡ فَمَا سَاَلۡتُکُمۡ مِّنۡ اَجۡرٍ ؕ اِنۡ اَجۡرِیَ اِلَّا عَلَی اللّٰہِ ۙوَ اُمِرۡتُ اَنۡ اَکُوۡنَ مِنَ الۡمُسۡلِمِیۡنَ﴿۷۲﴾

۷۲۔پس اگر تم نے منہ موڑ لیا تو میں نے تم سے کوئی معاوضہ نہیں مانگا میرا اجر تو صرف اللہ پر ہے اور مجھے یہ حکم دیا گیا ہے کہ میں فرمانبرداروں میں شامل رہوں۔

تفسیر آیات

انبیاء کسی ذاتی اور مادی مفاد کے لیے لوگوں کو حق کی طرف دعوت نہیں دیتے۔ انبیاء کا کوئی مفاد لوگوں کے ساتھ وابستہ نہیں ہے کہ لوگوں کی توجہ نہ ہونے پر اسے کوئی ضرر پہنچے۔ انبیاء کے سارے مفادات اپنے رب کے ساتھ وابستہ ہیں اور اس وابستگی کے لیے تسلیم درکار ہے کہ سارے معاملات اسی پر چھوڑدیے جائیں۔

اہم نکات

۱۔ داعیان حق کو کوئی مفاد جاہل اور نادان لوگوں کے ساتھ وابستہ نہیں کرنا چاہیے: اِنۡ اَجۡرِیَ اِلَّا عَلَی اللّٰہِ ۔۔۔۔