فَوَیۡلٌ لِّلَّذِیۡنَ یَکۡتُبُوۡنَ الۡکِتٰبَ بِاَیۡدِیۡہِمۡ ٭ ثُمَّ یَقُوۡلُوۡنَ ہٰذَا مِنۡ عِنۡدِ اللّٰہِ لِیَشۡتَرُوۡا بِہٖ ثَمَنًا قَلِیۡلًا ؕ فَوَیۡلٌ لَّہُمۡ مِّمَّا کَتَبَتۡ اَیۡدِیۡہِمۡ وَ وَیۡلٌ لَّہُمۡ مِّمَّا یَکۡسِبُوۡنَ﴿۷۹﴾

۷۹۔پس ہلاکت ہے ان لوگوں کے لیے جو (توریت کے نام سے) ایک کتاب اپنے ہاتھوں سے لکھتے ہیں پھر دعویٰ کرتے ہیں کہ یہ اللہ کی جانب سے ہے تاکہ اس کے ذریعے ایک ناچیز معاوضہ حاصل کریں، پس ہلاکت ہو ان پر اس چیز کی وجہ سے جسے ان کے ہاتھوں نے لکھا اور ہلاکت ہو ان پر اس کمائی کی وجہ سے۔

تشریح کلمات

وَیل:

ہلاکت۔ افسوس۔ جہاں ہلاکت اور مصائب سے نجات کا کوئی راستہ نہ ہو وہاں وَیل استعمال ہوتا ہے۔

تفسیرآیات

توریت کی تحریف اب ایک مسلمہ حقیقت بن چکی ہے۔ خود یہودی بھی اب یہ کہنے کی جرأت نہیں کر سکتے کہ توریت من و عن اللہ تعالیٰ کا کلام ہے،بلکہ جدید تحقیقات سے تو یہاں تک عقدہ کشائی ہوئی ہے کہ توریت کے قوانین حمورابی اور بابلی قوانین {حمورابی قدیم بابل کا ایک بادشا ہ، جس نے سب سے پہلے قوانین حکومت وضع کیے۔} سے ملتے جلتے ہیں۔

تحقیق مزید: الوسائل ۲۷ : ۱۳۱۔ تفسیر الامام ص ۳۰۲